【手動轉】應該要成為香港人常識嘅一部份！
⚠ 萬一齊齊中 TG，大人一定唔可以用手掂小朋友對眼 ⚠
大人隻手已經黏有 TG 微晶體，係咪想痛死小朋友？亦不能夠俾小朋友捽眼，必要時綁起佢都咁話；捽咗 TG 微晶體入眼，痛多幾錢重，對眼有排睇專科。
再講一次，小朋友中 TG 正確做法：
1）一嘢抱起佢，捉實佢雙手，奪命狂奔離開現場
2）搵水源（包括公廁、商場廁、舖頭廁，或者樽裝水、向食肆或路人求救俾水）。除咗水，津路烏龍茶、奶都可以。
3）洗眼
- 大人洗咗自己隻手先。
- 小朋友烏低身，左右輪流打側頭，逐隻眼倒水沖，沖左眼的話左眼向地右眼向天，相反亦然。
- 盡量唔好俾洗眼啲水流落條頸或個身，啲水流到邊，會乸到邊。
- 每隻眼原理上最好沖15分鐘，但現場附近若未係完全安全、未係空氣零 TG 污染的話，求其啦，反正你沖完走返屋企路上又係會沾染 TG 毒物。身處安全環境至沖耐啲。
4）洗臉、頸、手、腳等外露位置
- 用水沖，唔好抹 — 唔好擴散沾染 TG 部位。最多用紙巾「印」。
- 有番梘有皂液就用，會有少少幫助。冇就算。
- BB 仔 或者 距離太近中咗嚴重 TG 的話，係可行環境下，除晒小朋友 / BB 啲衫，幫佢地全身沖水（啲衫有污染請用膠袋入起佢隔離，或掉咗佢）。當然我明白响街好難，赤裸亦唔知點離開。
5）返到屋企大洗
- 除晒所有衫，將小朋友放係花灑下大洗。（唔好用浸浴）
- 小朋友的衫褲鞋襪袋，一係掉，一係膠袋入好隔離。唔好周圍擺，將毒物擴散。
- 水溫盡量凍，越熱會越乸痛
- 洗頸以上嘅臉部、頭髮時，一樣要好似洗眼咁烏低身、側頭。頭髮會沾有勁多TG，洗出嚟嘅水，若流過身體會好乸。
- 用返平日小朋友用嘅洗頭水、沐浴用品便可
- 口腔要用水漱口，鼻孔一係用洗鼻器一係就咁用水沖得幾多得幾多，唔好忽略耳孔外耳殼
- 換過晒乾淨衫
ps. 小朋友唔再痛，唔代表已經冇毒物遺留，唔代表已經冇事或安全。如果小朋友係大洗或者休息幾個鐘後都仲係痛，請睇醫生。但出入務必要注意局勢同安全，再受襲擊多次就大鑊。
pss. 我覺得最好平日同小朋友講定先，做吓 briefing，甚至玩演習，咁萬一中咗 TG 佢痛到發癲時，佢有個心理準備，知道大人會點樣幫佢，佢會合作啲同冇咁panic。
Search